Koronaviruset klarte ikkje å stoppe årets talentpris, men det vart ei litt anna ramme rundt utdelinga av prisen enn planlagt. Mandag 27 april fekk prisvinnaren, Hannah Moira Midtbø – Bruner, tildelt prisen i ei nesten tom Arna kyrkje.
.
Til stades var berre kulturkonsertkomiteen, representant for sponsoren Norengros AS, juryen og Bygdanytt, men stemninga var det ingenting å seie på då Hannah gav ein overbevisande minikonsert for ei handfull tilhøyrarar.
Hannah er 17 år gamal, og busett på Osterøy med kanadisk far og norsk mor. I grunngjevinga frå juryen står det mellom anna at søkjaren har stor interesse for norsk folkemusikktradisjon gjennom hardingfele- og flatfelespel, men syner og interesse for kanadisk folkemusikk og klassisk fiolin. Søkjaren får undervisning på høgt nivå i alle tre stilartar. Ho har deltatt i folkemusikkonkurransar både i Canada og Noreg med svært gode resultat bla med prisar både frå kappleikar i Noreg og meisterskap i Canada.
Hannah er aktiv både som soloutøvar og som medlem i ulike gruppe- og orkesterensembler. Søkjaren har ein klar ambisjon om å gjere musikk til eit levebrød gjennom vidare musikkutdanning, og har og mål om å bruke talentet sitt til å motivere barn og unge til å bli kjend med både folkemusikk og klassisk musikk.
Vi applauderer og gratulerer.
Bilete 1: Ove Skjoldal delte ut prisen på vegne av komiteen for kulturkonserten
Bilete 2: Hannah speler for ei nesten tom Arna Kyrkje
