eldrefest.
Ein av Arna Rotary Klubb sine aller kjekkaste aktivitetar,
kanskje den aller kjekkaste, kunne endeleg finne stad igjen måndag 9. januar.
Då kunne klubben igjen arrangera eldrefest for mange hyggelege seniorar i Arna.
Heile 91 personar takka ja til å delta på festen, og i god tradisjon blei så
godt som alle henta av klubben sine medlemer og kjørt til og frå
Kyrkjelydshuset i Arna.
Ein ikkje ukjend pandemi dei siste åra har gjort at det ikkje
har vore mogleg å arrangera denne festen sidan januar 2020. Etter varm velkomst
frå leiar i festkomiteen Ingeborg Eliassen, og ei engasjert helsing frå
Rotary-klubben ved president Anne-Britt Hauge, inneheld festen dei «faste
postane», som gode smørbrød med velsmakande varm sjokolade til, vakker korsong
ved Haukeland Songlag, og seinare kaffe og tebrød. Og innimellom dette kåserte
Rotary-medlem Siv Lekven med interessante tankar omkring det å bli eldre,
tilhøva mellom generasjonar etter som åra går, og spesielt kor viktig hennar
erfaring er når det gjeld korleis besteforeldre og barneborn finn ut av dette
saman.
Haukeland Songlag er nemnt, og det er imponerande å oppleve
kor velvillig dei stiller opp år etter år på denne festen med sin gode korsong.
Stor takk også til Jan Erik Reknes som stiller opp og trakterer pianoet både
til allsongen og fin bakgrunnsmusikk.
Rotary sitt motto er «Å gagne andre». Eldrefesten er eit godt
døme på akkurat det.
eldrefest.