Årets eldrefest
Tradisjonar er gode å ha, gode tradisjonar er viktig å halde i hevd og omkring juletider er tradisjonar ekstra viktig for mange. Slik er det også i Arna Rotary Klubb, der den årlege Eldrefesten tidleg i januar er noko av det kjekkaste klubben har gleda av å laga til.
I år fann festen stad 13. januar, og ca 90 gjestar trossa det særdeles våte veret og deltok denne kvelden. Dei aller fleste blir køyrd både til og frå festen av Rotaryklubben sine medlemer, men ein del tok seg fram på eiga hand, enten med eigen bil eller til fots i styggeveret.
Årets president i Arna Rotary Klubb, Vidar Skistad, helste frå klubben og orienterte om klubben sine aktiviteter gjennom året, både lokalt og utover lokalsamfunnet. Rotary sitt motto er «Å gagne andre», noko som inneber både inspirasjon og utfordringar.
Det er også tradisjon på dette arrangement at gjestane får servert varm sjokolade og snittar, noko me både ser og høyrer blir sett stor pris på.
Eit fast og veldig populært innslag på festen er også at Haukeland Songlag deltek med nydeleg framføring av kjære julesongar, under leiing av dirigent Tove Anette Holter.
Kåsør denne gongen var Bjørn Ove Eliassen, som snakka om sine oppvekstår i Arna og interessante hendingar i det som den gongen var ei bygd i Haus kommune.
Seinare vart det servert kaffi og kringle, før stemningsfull avslutning med Deilig er jorden, akkompagnert av den faste pianisten på desse festane, Jan Erik Reknes.
På vår Facebookside kan du lese meir og sjå bilder frå festen: https://www.facebook.com/share/p/163o8qKqvs/